Pink Bullets - The Shins

Í Trivial Pursuit í gærkvöldi:

Kristján: "Hver skrifaði handritið að Jurassic Park?"
Sandra: "Var það ekki Ross?"

Til að forðast misskilning þá var spurningunni ekki beint til Söndru...

Okei... þetta var allavega mjög fyndið í gær.

Ísland ég elska þig - Baggalútur

Hlusta á lag.

Ó, aldagamla Íslands byggð,
þér ævarandi eg heiti tryggð.
Þú þekkir ekkert illt,
þér enginn getur spillt.
Styður öngvin stríð,
staðföst, frjáls og blíð.

Engilfríða fósturjörð,
fyrir þér liggur tíðin hörð.
Flárátt lævíst lið,
landið hatast við,
þitt helga hjarn vill fá,
hrifsað til sín aftanfrá.

Góða land, gjöfula land.
Gullnir steypast fossar þínir enn.
Sæla fold, sjálfstæða mold.
Sakleysi þitt girnast vondir menn.

Gull þín brjóta gírug flón,
er gleypa vilja hið dýra frón.
En aldrei, ástin mín,
skal efnd sú myrka sýn,
að fjallsins fagra mær,
sé forfærð, svívirt, gráti nær.

Glæsta land, gegnheila land.
Gullnir steypast fossar þínir enn.
Ísafold, magnþrungna mold.
Meyjarblóm þitt girnast vondir menn.

Dice - Finley Quaye / William Orbit

Gerðu ávallt hið rétta. Það gleður einhverja og kemur hinum á óvart.
-Mark Twain.

Eins og þið hafið kannski tekið eftir þá elska ég að tala í tilvitnunum og myndmáli.
Love it.

Emotional Anorexic - Svavar Knútur

Þegar maður er nánast atvinnulaus þá verður maður að búa sér til verkefni til að halda geðheilsu.

Sem betur fer er ég nokkuð góð í því og hef verið vel upptekin síðustu vikurnar.

Um helgina lagði ég lokahönd á herbergið mitt.
En ég hef verið að vinna að breytingum síðan um jólin.

Næst var þá að laga til niðri í geymlsu þar sem ég hef útbúið mér málningaraðstöðu.
Ég kláraði þar í gærkvöldi og er nú að velta fyrir mér hvað ég eigi að gera næst.

Áður en ég tók til hendinni var varla göngufært þarna inni.
En nú er öllu vel raðað og allt vel skipulagt.

Serían er svo toppurinn á kósýheitunum.

Þið getið kannski áttað ykkur á því núna hvað ég hef lítið að gera víst ég ákvað að hoppa niður og taka mynd af "afrekinu". Haha.
En víst myndavélin var komin á loft þá voru einnig nokkrar myndir af herberginu mínu teknar:

Krúttlegheit og útsjónarsemi voru allsráðandi í þessum breytingum.
Það eina sem ég keypti voru svörtu hillurnar fyrir ofan rúmið.

Ég notaði meira að segja gamlar tímaritahirslur.
Þær voru hvítar en ég málaði þær bara svartar.

(Þ.e. þann hluta sem er sjáanlegur).

Þegar ég var búin að mála þær náði krúttið í mér völdunum og því málaði ég á þær hvítar doppur sem má nú finna nánast allsstaðar í herberginu...

Talandi um útsjónarsemi, þá gerði pabbi trönurnar, á fyrstu myndinni, fyrir mig.
Hann notaði gamla hillu sem var ekki lengur í notkun, bút af gólflista, plötu, nokkra nagla og voilá:

Krútt Útsjónarsemisdóttir kveður í bili.
Sælar.

Fuck You - Lily Allen

Hæ Fjóla.
(Það virðist sem þú sért sú eina sem lest bloggið mitt, "kommentalega" séð allavega).

Við Gunnar fórum á Versló-söngleikinn Thriller í gær.
Hann vann svo miða í bingói ekki fyrir svo löngu og bauð hann mér að koma með sér.

Ég hef aldrei verið voða hrifin af söngleikjum Verslunarskólans en ég fór nú samt í Loftkastalann í gær með opnum huga.
Hvort það segi meira um okkur Gunnar eða söngleikinn veit ég ekki, en við gengum út stuttu eftir hlé. Eða stuttu eftir að ég pikkaði í hann því hann hafði sofnað! 

Við höfðum samt alveg lúmskt gaman af því hve lélegt leikrit þetta var, þannig að við löbbuðum út með bros á vör...

Á leiðinni heim kyngdi snjónum niður.
Þegar við komum heim gátum við ekki lagt bílnum á sinn stað því stæðið var yfirfullt af snjó.

Þegar það hætti að sjóa þá fórum við Gunnar út með myndavélina:

Elska svona "óvart-myndir".

*

Ég er farin út í göngutúr með Helgu í snjónum.
Elska þennan snjó!

Heyri í þér síðar Fjóla mín.

Underdog - Kasabian

Ég elska góðan svita.

Nei, bíddu... ég elska þegar eitthvað er góðs viti.
Rugla þessu alltaf saman!

Vá, ég veit ekki hvaðan þetta kom.
Það þarf enginn að segja mér að ég hafi einkennilegan húmor...
Ég er að fullu upplýst um málið.

Annars er helgin komin og ég fagna því að þessu sinni.
Ef ég hef einhvern tíma átt skilið að detta í það þá er það núna!

En ég tók þá ákvörðun eftir síðasta djamm að taka pásu fram að InterRaili.
Ég er hins vegar komin með ágætis reynslu í að segja "skítt með það", þannig að það er aldrei að vita hvernig kvöldið verður!

(Miðað við þessa færslu mætti samt halda að ég hafi fengið mér nokkra kokteila í hádeginu...)

Ég held það sé kominn tími til að minnka kaffineysluna.
Verið sæl.

Cold Summer - Seabear

Þegar ég var á leið heim úr vinnunni á þriðjudaginn í síðustu viku varð mér litið út um gluggann og sá þá mögnuðustu norðurljós sem ég hef séð.

Ég var búin að bíða mjög lengi eftir norðurljósum svo ég gæti tekið myndir af þeim þannig að þegar ég kom heim fékk ég mér að borða, tók saman myndavéladótið mitt, klæddi mig og keyrði út á Álftanes. En þegar ég kom þangað voru norðurljósin að mestu horfin.

En ég náði nokkrum myndum, þær eru að vísu nokkuð kornóttar. En mér er skítt sama, haha.
Er svo sátt við að hafa loksins náð norðurljósamyndum.

 

Dry your eyes - The Streets

Fyrir nokkrum árum þá hætti ég að kynna mig sem Begga.
Þó að Bergþóra sé frekar langt, og kannski óþjált, nafn finnst mér það bara mikið fallegra en Begga.

Þegar ég kynnist nýu fólki spyr það mig yfirleitt hvort ég sé ekki kölluð eitthvað annað en Bergþóra. Ég svara þá oftar en ekki með því að segja þeim að ég sé bara kölluð það sem fólk vill kalla mig.

Nokkrum á Bjarna Fel fannst þetta voða sniðugt og ákváðu að kalla mig Berg, þ.e. Bergur.

Það er hins vegar ekkert nýtt því ég er kölluð Bergur af nokkuð mörgum aðilum.
Best finnst mér samt þegar þau kalla mig Börger.

Listin yfir nöfn sem ég svara til fer sem sagt sístækkandi.
Á núverandi lista eru nöfnin:

-Bergþóra
-Begga
-Beggus
-Beggos
-Beggulingur
-Beggalá
-Besóra
-Bengóla
-Bergur
-Börger

Svo svara ég auðvitað alltaf líka nöfnum eins og:

-Meistari
-Snillingur
-Besta

En það segir sig náttúrulega alveg sjálft.
Frekar basic sko.

I've Got A Crush On You - Stacey Kent

Ég var að finna þriðja veikleika minn; Jazztónlist.

Hinir veikleikar mínir eru hnetusmjör og kaffi.
Þeirra er valdið... mátturinn og dýrðin.

Desert Eagle - Ratatat

Að dreyma vel getur verið alveg jafn slæmt, eða verra jafnvel, og að dreyma illa.

Þegar maður vaknar út frá martröð, leiðinlegum eða óþægilegum draumi þá kemst maður yfir það skömmu síðar þegar maður áttar sig á því að, jú, þetta var bara draumur.

Hins vegar þegar maður vaknar út frá góðum draumi, þar sem þú hefur t.d. náð að leysa öll vandamálin sem hafa böggað þig síðustu dagana, verða að sætti við alla sem þú átt í ósáttum við, eða gerðir eitthvað sem þú hefur ekki kjark til að framkvæma í raunveruleikanum, þá getur það verið frekar svekkandi og pínu erfitt sætta sig við að þetta hafi bara verið draumur.

Þetta var umhugsunarefni dagsins.

Bergþóra.