Pink Bullets - The Shins

Svo lengi sem ég man eftir mér þá hefur það alltaf verið þannig að það er eitt eða tvö lög sem ég hlusta á aftur og aftur meðan ég er í próflestri.

Þegar ég er búin að lesa yfir mig, eða ef ég er ekkert búin að ná að lesa því ég er hreinlega of stressuð (svolítið mikið þannig í gangi í gær og í dag), þá hlusta ég á þessi lög og leyfi mér að gleyma stað og stund...

Í stúdentsprófunum árið 2009 var það t.d. lagið Looking At The Sun með Gramercy Arms. Og í jólaprófunum þar á undan voru það lögin Sökudólgur óskast og Þá kemur þú með Nýdönsk

Ég veit ekki nákvæmlega hvað það er sem veldur því að þetta eru alltaf bara eitt eða tvö lög, þar sem þetta er ekki einhver meðvituð ákvörðun hjá mér að hlusta á þessi lög... þetta gerist bara alltaf svona.

Í þessum prófalestri (sem er rétt að byrja, þannig að ég áskil mér allan rétt á að detta í ástarsamband með einhverjum öðrum lögum þegar lengra líður á) eru það lögin Pink Bullets og Strawberry Swing sem ég hlusta á svona 10x á dag....

8 daga í próf.
Ég dey.

Supposed To Be - Jack Johnson

Ég er að hugsa um að fara upp á hlöðu að læra... svo ég geti fengið mér ís!
Haha.

Er að velta fyrir mér að prófa bragðaref með Oreo-kexi.
Held það sé villt.

(Ekki að það sé ekki Vesturbæjarísbúðarútibú svona tæpum kílómetra frá húsinu mínu. Það er bara mikið meiri stemmning í að fara í orginalinn).

Death And All His Friends - Coldplay

Ég er orðin fastagestur í ísbúð Vesturbæjar.
Fer nánast þangað daglega eftir að ég byrjaði að fara upp á Þjóðarbókhlöðu til að læra.
(Hvernig væri þetta eiginlega ef ég byggi ennþá á Hagamelnum!?)

Annars er ég búin að vera frekar mikið dugleg við lesturinn síðustu daga.
Í dag var síðasti tíminn í Innganginum, þannig að næstu daga mun ég bara vera að lesa.
Nánara tiltekið þar til laugardagsins 25. september, en þá er Inngangsprófið.

...Ég veit ekki hversu góð ákvörðun það var að fá mér aðgang að HÍ-netinu.
Ég held ég fari niður og fái mér kaffi og snúi svo aftur að lestrinum.
Og svo verður auðvitað íspása á eftir!

Þá kemur þú - Nýdönsk

Þó ég biðji um nýja veðurspá er ekkert víst að úr henni rætist,
er áhugasamur um eigin gróður en haf aldrei verið veðurfróður.
Og lægðirnar sem leggjast á mig koma í veg fyrir að ég kætist.
Þegar dagurinn verður aldrei bjartur og hugurinn orðinn bikasvartur,
eins og óbotnaður fyrripartur, órímaður.

Ég er semí að enduruppgötva Nýdönsk þessa dagana...

Courage - The Whitest Boy Alive

Var ég á Þjóðarbókhlöðunni í allan dag að læra?
-Já.

Ætla ég að eyða öllum morgundeginum í bömmer á Þjóðarbókhlöðunni að læra því ég missi af Þingvallaferð Orator því ég var of sein að ákveða hvort ég ætti að fara eða ekki?
-Já.

Er það samt ekki pínu lán í óláni að það sé uppselt?
-Jú.

Er ég ekki samt búin að bæta það pínu upp með að eiga sjúklega kósý kvöld með bubblubaði, Vinum og kertaljósum?
-Semí.

Og er ég ekki að fara að detta í það í kveðjupartýinu hennar Siddý á laugardaginn?
-Mikið rétt.

Jaðra þessar spurningar við geðveiki?
-Alveg frekar mikið...

A Comet Appears - The Shins

Þetta eru þau lög sem ég valdi inn á Queen-mixið sem ég útbjó fyrir Önnu Hill.
Diskurinn fékk einfaldlega bara nafnið 'Queen'.
En hins vegar fékk hann undirtitilinn 'Fyrir lengra komna'.

Eins og ég sagði hér einu sinni, þá er þetta eitt það erfiðasta sem ég hef nokkurn tíma gert, og ef ég væri að gera listann núna, eða ef ég myndi gera hann aftur, þá liti hann líklegast allt öðruvísi út!

Þetta er kannski svona svipað erfitt og ætla sér að búa til Friends-mix, með öllum bestu Friends þáttunum...

I'll Fight - Wilco

Pabbi sagði um daginn að hann væri kominn með hugmynd að bók: Bróðir minn lánshjarta.

Mér fannst það mjög fyndið.
(Fimmaurabrandarar eru mjög vinsælir innan fjöldskyldunnar...)

Into My Arms - Nick Cave

Lögfræðin byrjuð.
Metnaðurinn í hámarki.
Facebook hefur aldrei verið jafn óspennandi.
Ekki spaug.

Ég fór bara inn á feisið í gær til að senda mjög ópersónulega afmæliskveðju á Gunnar og til að athuga hvort það væri eitthvað nýtt í fréttum frá Sahlgrenska sjúkrahúsinu í Gautaborg.

Kjartan frændi, biðstofustjóri, var búinn að bíða eftir nýju hjarta í 19 vikur þegar það var hringt í hann á fimmtudaginn fyrir viku og hann upplýstur um að það biði hans hjarta í Svíþjóð. Þá var stokkið upp í flugvél og svo bara beint á skurðarborðið - Nýtt hjarta byrjaði að slá kl. 06:02 (að staðartíma) á föstudagsmorgninum. Gert var ráð fyrir að hann myndi ekki vakna fyrr en um kvöldið eða jafnvel næsta dag, en um hádegisbil á föstudeginum var hann vaknaður, laus úr öndunarvélinni og byrjaður að reyta af sér brandarana, eins og honum einum er lagið.

Það eru því aðeins góðar fréttir sem hafa borist hingað heim :)
(Hér er hægt að fylgjast með gangi mála).

En lögfræðin bíður.
Ætla bara að birta þessa færslu á facebook fyrst...

Yes Yes Yes - Elsinore

Já, já, já.

England - The National

Hiti, hálsbólga, beinverkir og almenn mygla.
Damn it.

Ég hringdi mig inn veika í vinnuna í fyrsta skipti í svona 4 ár.
Það er nefnilega pínu prinsipp hjá mér að hringja mig ekki inn veika í vinnu eða skóla, því þá er að ég að viðurkenna fyrir sjálfri mér að ég sé veik.

Whenever I start feeling sick, I just stop being sick and be awesome instead-viðhorfið virkar nefnilega nánast undantekningarlaust.

Ef ég ákveð að vera ekki veik þá hætti ég að vera veik.

Ég man bara eftir tveimur atvikum sem það hefur ekki virkað:

Atvik eitt:
Fimmtudaginn 23. febrúar 2006 mætti ég í skólann eftir að hafa verið slöpp og með hálsbólgu í nokkra daga. Ég var myglaðari en allt og gat ekki talað því ég var svo bólgin í hálsinum, en þrjóskuhausinn ég kláraði samt skóladaginn og labbaði svo heim.
Um kvöldið fór ég á læknavaktina og komst þá að því að ég var með streptókokkasýkingu og 39 stiga hita.
...Ég játaði mig sigraða og mætti ekki í skólann á föstudeginum.

Atvik tvö:
Það er dagurinn í dag.
Ég var staðráðin í því í gær að vera ekki veik í dag, en það gekk ekki eftir.
EN ég verð orðin frísk á morgun. Sannið þið til :).

*

Annars var ég að koma heim úr aðeins of ljúfri Svíþjóðarferð.
Við Gunnar flugum út að morgni 13. ágúst og komum aftur heim í gærmorgun.

Do to-listi ferðarinnar:

-Kaupa hálfa H&M verslunina í Lundi
-Vera ógeðslega krúttleg og hjóla út um allt
-Hjóla út í búð eldsnemma um morgun og kaupa nýbökuð rúnstykki
-Borða ógeðslega mikið
-Fá okkur Dr Pepper í Lundi
-Fá okkur McFlurry
-Taka lestina til Malmö og leika túrista
-Tjilla í sólinni í garðinum hjá Þóru og Sverri
-Tjilla undir stjörnubjörtum himni úti í garðinum hjá Þóru og Sverri
-Búa til eplaköku úr eplunum af eplatrénu

Þetta er uppskriftin að fullkominni Svíþjóðarferð.
Við náðum að strika yfir allt á listanum og gera ýmislegt annað á þessum fjórum dögum.
Reyndar náðum við ekki að túristast almennilega í Malmö því það var svo klikkuð rigning...

Við vorum mjög ódugleg við að taka myndir en hér koma nokkrar:

Ströndin í nýja hverfinu í Malmö.

Turning Torso, hæsta bygging Skandinavíu.

Hefði ekkert á móti því að búa þarna.
Og vera með ána í bakgarðinum:

The Ultimate Bagel.

Rigningin í Malmö á laugardeginum.
Þetta var klikkun sko.

http://mbl.is/mm/frettir/erlent/2010/08/15/styttir_upp_i_kaupmannahofn/

Um kvöldið þegar við vorum á lestastöðinni að bíða eftir lestinni okkar, þá sló niður eldingu sirka 1,5 km frá okkur. Allar upplýsingar á spjaldinu við brautarpallinn hurfu og lestin kom 10 mínútum of seint. Þegar við settumst upp í lestina var enginn annar í henni en skömmu síðar var bankað á rúðuna utan frá og við beðin um, með handabendingum, að opna lestina.
Inn streymdi rennandi blautt og áhyggjufullt fólk og ein kona sagði við okkur, "I hope the train survives this weather".
Lestin lagði svo af stað 30 mínútum eftir áætlun.

Kl. 9 á sunnudagsmorgninum hjóluðum við Gunnar út í búð og keyptum morgunmat.

Ítalskur ís. Sjitt hvað ég elska hann.

Ég elska líka Karamel Kungen.

Og Dr Pepper.

Og McFlurry...

H&M er bara fjórir pokar min.

Ég er farin að fá mér Panodil Hot.
Er nú þegar búin með svona 9 lítra af því...